‘శ్యామ్‌ సింగరాయ్‌’లో మరో హీరో ఈయనే!

 

నాని కథానాయకుడిగా తెరకెక్కుతోన్న చిత్రం ‘శ్యామ్‌ సింగరాయ్‌’. రాహుల్‌ సాంకృత్యన్‌ దర్శకత్వం వహిస్తున్నారు. యాక్షన్‌ నేపథ్యంలో రూపొందుతున్న ఈ చిత్రంలో మరో యువ కథానాయకుడు కనిపించబోతున్నాడు. ఆయనెవరో కాదు నటుడు, దర్శకుడు రాహుల్ రవీంద్రన్‌. ఇందులో ఆయన సహాయక పాత్ర పోషిస్తున్నారు. ఈ విషయాన్ని తానే ట్విటర్ వేదికగా తెలియజేశారు. నిహారిక ఎంటర్‌టైన్‌మెంట్‌ సంస్థ నిర్మిస్తోన్న ఈ చిత్రంలో సాయి పల్లవి, కృతి శెట్టి, మడోన్నా సెబాస్టియన్‌ నాయికలుగా నటిస్తున్నారు. మిక్కీ జె. మేయర్‌ స్వరాలు సమకూరుస్తున్నారు.

కోల్‌కతా నేపథ్యంలో సాగుతుంది ఈ చిత్రం. ఇటీవలే విడుదలైన నాని ఫస్ట్‌లుక్‌ సినిమాపై ఆసక్తిని పెంచుతోంది. ఇప్పటి వరకు కనిపించని లుక్‌లో దర్శనమిచ్చి అందరి దృష్టిని ఆకర్షించాడు నాని. మరి రాహుల్‌ పాత్ర ఎలా ఉంటుందో తెలియాలంటే కొన్ని రోజులు ఆగాల్సిందే.