గెడ్డం పెంచుతున్న యువతి.. 15 ఏళ్లుగా షేవింగ్ చేయడం లేదు, ఈ స్టైలే నచ్చిందట!

 

నబ్రస్కాకు చెందిన 27 ఏళ్ల క్లేడే వార్రెన్‌కు టీనేజ్‌లో ఉన్నప్పుడు ముఖం మీద వెంటుకలు వచ్చాయి. అయితే, ఆమె వాటిని ఏ రోజు తీసేయాలని అనుకోలేదు. ఆమెకు అలా ఉండటమే ఇష్టమట

అమ్మాయిలు శరీరం మీద చిన్న వెంటుక కనిపిస్తేనే చాలా బాధపడిపోతారు. వెంటనే బ్యూటీ పార్లర్‌కు వెళ్లి వాటిని పీకించేసుకుంటారు. అయితే, అమెరికాకు చెందిన ఈ యువతి మాత్రం ముఖం మీద వెంటుకలు మొలిచినా పెద్దగా లెక్క చేయడం లేదు. పైగా, ఈ స్టైలే నాకు నచ్చిందంటూ గెడ్డం పెంచుకుని తిరుగుతోంది. తల్లిదండ్రుల ఎంత మొత్తుకున్నా సరే ఆమె గెడ్డం పెంచుకోడానికే సిద్ధమైంది.

నబ్రస్కాకు చెందిన 27 ఏళ్ల క్లేడే వార్రెన్‌కు టీనేజ్‌లో ఉన్నప్పుడు ముఖం మీద వెంటుకలు వచ్చాయి. అయితే, ఆమె వాటిని ఏ రోజు తీసేయాలని అనుకోలేదు. వెంటుకలు గురించి పెద్దగా పట్టించుకోకుండానే స్కూలుకెళ్లేది. తోటి విద్యార్థులు హేళన చేసినా సరే.. తనకు ఇలా ఉండటమే ఇష్టమని చెప్పేది. కొద్ది రోజుల తర్వాత స్నేహితులు కూడా ఆమెను అలా చూడటానికే అలవాటుపడిపోయారు. అయితే, అప్పుడప్పుడు క్లేడే గెడ్డం తీసి సర్‌ప్రైజ్ ఇస్తుంటుంది. కానీ, తనని తాను గెడ్డం లేకుండా చూసుకోవడం తనకు అస్సలు ఇష్టం ఉండదు. అందుకే, ఆమె ఎప్పుడూ గెడ్డంతో ఉంటుంది.

ఈ సందర్భంగా క్లేడే మాట్లాడుతూ.. ‘‘స్కూల్లో చదువుకుంటున్న సమయంలో నాకు మీసం వచ్చింది. దాన్ని నేను అలాగే ఉంచేయాలని అనుకున్నాను. మూతి మీద వెంటుకలు పెరగడం చూసి అమ్మ వాటిని తొలగించుకో, లేకపోతే పెద్ద సమస్యగా మారతాయని చెప్పింది. అయితే, నేను అందుకు అంగీకరించలేదు. షేవింగ్ చేయకూడదని నిర్ణయించుకున్నా. చాలామంది తమ చర్మం బాగోలేకపోతే విశ్వాసాన్ని కోల్పోతారు. ఆ లోపాన్ని సరిదిద్దుకోడానికి ఏవేవో చేస్తుంటారు. మన చర్మంతో ఎప్పుడు సౌకర్యవంతంగా ఉండాలి. లోపాలను పట్టించుకోకూడదు’’ అని తెలిపింది.

‘‘డేటింగ్ యాప్ టిండర్‌లో నన్ను చూసినవాళ్లు నా గురించి చాలా కామెంట్లు చేస్తుంటారు. అవి నన్ను బాధిస్తుంటాయి. కానీ, నాకు నా మీద విశ్వాసం ఉంది. నాకు నచ్చినట్లు నేను ఉంటాను. ఇతరుల కోసం నా అభిరుచిని మార్చుకోలేను. ఇప్పటివరకు నేను డేటింగ్ చేసిన వ్యక్తులు నన్ను చాలా ఇబ్బంది పెట్టారు. కానీ, నా చివరి బాయ్‌ఫ్రెండ్ నాకు చాలా సపోర్ట్ చేసేవాడు. నా గెడ్డమంటే అతడికి చాలా ఇష్టం’’ అని తెలిపింది. పాలిసిస్టిక్ ఓవరీ సిండ్రోమ్ సమస్య వల్ల అమ్మాయిల్లో కూడా రోమాలు విపరీతంగా పెరుగుతాయి. అయితే, క్లేడే‌కు వచ్చిన సమస్య ఏమిటనేది మాత్రం తెలియరాలేదు. ఎందుకంటే.. ఆమె ఏ రోజూ ఈ సమస్యపై వైద్యులను సంప్రదించలేదు