అలా చేస్తే ఒక్కొక్కరికి రూ.10వేలు అకౌంట్‌లో వేస్తాం.. అచ్చెన్నాయుడు సంచలన ప్రకటన

 

తిరుపతి లోక్‌సభ పరిధిలో పథకాలు రావని వాలంటీర్లు, అధికార పార్టీకి చెందిన వారు బెదిరిస్తే.. వెంటనే తమకు సమాచారం అందించాలన్నారు. తిరుపతి లోక్‌సభ పరిధిలోని ఏడు నియోజకవర్గాలకు ఇది వర్తిస్తుందన్నారు.

ఏపీలో తిరుపతిలో హీట్ పెంచుతోంది. ప్రధాన పార్టీల అభ్యర్థులు నామినేషన్లు దాఖలు చేశారు.. ప్రచారానికి సిద్ధమవుతున్నాయి. టీడీపీ మాత్రం దూకుడుగా ముందుకు సాగుతోంది. అందరికంటే ముందుగానే నామినేషన్ దాఖలు చేసి ప్రచారాన్ని ప్రారంభించింది. ఏపీ టీడీపీ అధ్యక్షుడు అచ్చెన్నాయుడు సైతం తిరుపతి ఉప ఎన్నికపై ఫోకస్ పెట్టారు.. ఆయన సంచలన నిర్ణయం తీసుకున్నారు. పథకాల రావంటూ బెదిరింపులకు పాల్పడుతున్నారని ఆరోపిస్తూ.. వినూత్నంగా సంచలన ప్రకటన చేశారు.

తిరుపతి లోక్‌సభ పరిధిలో పథకాలు రావని వాలంటీర్లు, అధికార పార్టీకి చెందిన వారు బెదిరిస్తే.. వెంటనే తమకు సమాచారం అందించాలన్నారు. వైఎస్సార్‌సీపీకి ఓటెయ్యకపోతే పథకాలు రావని భయపెట్టేవారి గుట్టురట్టు చేయాలని అచ్చెన్నాయుడు పిలుపునిచ్చారు. ఆయన అలాంటి వారి సమచారాన్ని పార్టీకి అందించాలని 7557557744 వాట్సాప్ నంబర్‌ను అందుబాటులోకి తీసుకొచ్చామన్నారు. ఈ నంబర్‌కు కాల్ రికార్డు కానీ, ఫొటో కానీ వాట్సాప్ చేస్తే సంబంధిత వ్యక్తుల అకౌంట్‌లో రూ.10వేలు వేస్తామని చెప్పారు. తిరుపతి లోక్‌సభ పరిధిలోని ఏడు నియోజకవర్గాలకు ఇది వర్తిస్తుందన్నారు. ఈ విషయాన్ని అందరికీ చేరేలా చేయాలని కోరారు.

ఏపీలో వైఎస్సార్‌సీపీకి మంచి ఫలితాలు వచ్చినా.. తిరుపతిలో మాత్రం టీడీపీకి ఎక్కువ శాతం ఓట్లు వచ్చాయన్నారు. అధికార పార్టీ బెదిరింపులతో ఓటమి తప్పలేదని.. పథకాలు పోతాయనే భయం అవసరం లేదని.. ఆ డబ్బులు ప్రభుత్వానివి అన్నారు. అవి ఎవరి సొత్తు కాదని.. ప్రజల డబ్బులన్నారు. 10 పైసలు ఇచ్చి.. 90 పైసలు దోచుకుంటున్న జగన్ రెడ్డికి బుద్ధి చెప్పాలంటే.. తిరుపతి ఉప ఎన్నికలో టీడీపీని గెలిపించాలని కోరారు.